مەغریب.. دووەم ڕۆژی کۆنفرانسی تایبەت بەڕۆڵی ئافرەتان لە کاری ڕێکخراوەیی

لە دارالبەیزا لەمەغریب لە ماوەی ٢٥-٢٦ی ئەیلوولی ٢٠٢٥ کۆنفرانسێكی تایبەت بە رۆڵی ئافرەتانی سەندیکایی و گۆڕانکاریەکان بەرێوەدەچێت كە تیایدا دوو نوێنەری یەكێتی مامۆستایانی كوردستان بەشدارن. شاندی یەكێتی مامۆستایانی كوردستان پێكهاتووە لە بەرێزان خاتوو (حەسیبە مستەفا جەمیل) ئەندامی مەکتەبی سکرتاریەت ، و خاتوو (ئەمەل سەیف الدین نووری) ئەندامی لقی کەرکووکی یەكێتی مامۆستایان، هەردووبەرێزان نوێنەرایەتی دەنگی ئافرەتی كورد لەبواری پەروەردە لەم کۆنفرانسە گرنگە دەكەن.

ئەم کۆنفرانسە، کە لەلایەن یەکێتی سەندیکای عەرەبی بە پشتگیری دامەزراوەی فریدریش ئێبرت و ڕێکخراوە نێودەوڵەتییەکانی دیکە بەرێوەدەچێت، كە تیایدا تیشك دەخرێتە سەر ڕۆڵی بەرەوپێشچووی ئافرەتان و ژنان لە سەرکردایەتی سەندیکاكاندا و ئەو ئاستەنگانەی کە ڕووبەڕوویان دەبنەوە. هەروەها باس لە رۆڵ و پێگەی ئافرەتان و ژنانی عەرەب و سەركردایەتیكردنیان لە كاری سەندیكایی و رێكخراوەییدا دەكرێت. جگە لەمەش باس لە ئاستەنگ و ئالنگارییەكان دەكرێت بۆ رێكخستنی كاری رێكخراوەیی و بەهێزتركردن و پاراستنی مافەكانی ئافرەتان و ژنان لەم كۆنفرانسەدا.