_edited.png)
یادی دامەزراندنی یەكێتی مامۆستایانی كوردستان پیرۆز بێت
ئەگەر جاران مامۆستای کورد
یەک مناڵیان پێ دەگەیاند
ئەبێ ئەمڕۆ مامۆستای کورد
دانیشێ و بەڕاوێژی ورد
رێگای پێگەیاندن دانێ
بۆ ملیونان نەک ئینسانێ
"گۆران"
لە 61 مین ساڵوەگەڕی دامەزراندنی یەکێتی مامۆستایانی کوردستان، وێڕای پیرۆزبایی گەرممان بۆ سەرۆک و ئەندامانی سکرتاریەت و تەواوی ئەندامانی یەکێتی مامۆستایانی کوردستان، بەو پەڕی ڕێز و شکۆوە دەڕوانینە ڕۆڵی ماندوونەناسانەی مامۆستایانی کوردستان، کە هەمیشە چرای زانست و فیربوون و مەشخەڵی ئازادیخوزایی و ڕۆشنبیری بوونە.
یەکێتی مامۆستایانی کوردستان لە هەموو قۆناغەکانی خەباتی پیشەیی و زانستی و نیشتمانیدا، ڕۆڵێکی مەزنی لە ڕێی خزمەتکردنی پرۆسەی پەروەردە و داکۆکیکردن لە ماف و داخوازییەکانی مامۆستایانی کوردستان بینیووە.
یادکردنەوەی یەکێتی مامۆستایانی کوردستان، یادی هەموو ئەو مامۆستا ڕابەر و تێکۆشەرانەیە، کە لە مێژووی پەروەردە و فێربوونی کوردستان، ڕۆڵەکانی گەلەکەمانیان لەسەر ڕێچکەی نیشتمانپەروەری و خۆڕاگری و خۆشویستنی وڵات و پەروەردەیەکی ڕاست و دروست ڕاهێناون.
هەڵوێستی مامۆستایانی کوردستان، لە هەموو سەروەختێکدا، بە تایبەت لە سەختی و ناخۆشییەکانی سەردەمی گەمارۆی ئابووری دوای ڕاپەڕینی ئاداری 1991 لە یاد ناکرێ. مامۆستایان لەو ڕۆژگارە نالەبارە و لە قۆناغە سەختەکانی سەردەمی شۆڕشەکانی کوردستان و قۆناغی شەڕی داسەپاوی تاریکپەرستانی داعش، ڕۆڵیان ئەوەندە ئازایانە و دڵسۆزانە بووە، هەمیشە بە درەوشاوەیی لە ویژدان و مێژووی گەلی کوردستان دەمێنێتەوە.
وەزارەتی پەروەردەی هەرێمی کوردستان، شانازی بە ڕۆڵی پڕ لە بەرهەم و بەخشش و مێژووی پڕشەنگداری مامۆستایانی کوردستان دەکات، بۆ هەمیشەش شکۆی مامۆستا بەرز ڕادەگرێ و کار بۆ باشترکردنی ژیان و گوزەران و دەستەبەرکردنی تەواوی ماف و خواستەکانیان دەکات، بۆ ئەوەی لە ژێر سێبەری ئازادی ئەمڕۆی کوردستان، باشتر ڕۆڵی نیشتمانی و پیشەییانەی خۆیان ببینن.
بەم بۆنەیشەوە، یادی ئەو مامۆستایانەش دەکینەوە، کە ئێستا لە نێوماندا نەماون، سەری ڕێز و نەوازش بۆ گەورەییان دادنوێنین و سڵاو و خۆشەویستی دەنێرین بۆ گڵکۆی پیرۆزیان و یاد و یادەوەریان بە زیندوویی ڕادەگرین.
دووبارە پیرۆز بێت یادی دامەزراندنی یەکێتی مامۆستایانی کوردستان و خەبات و مێژووەکەی هەر گەش و درەوشاوە بێت.
وەزارەتی پەروەردە
15ی5ی2023
