رێكخراوی عەرەبی بۆ پەروەردە لەهەولێر رەوشی پەروەردەو خوێندن تاوتوێ دەكات

بۆ یەكەمجار لەشاری هەولێر رێكخراوی عەرەبی بۆ پەروەردە بەهەماهەنگی لەگەڵ یەكێتی مامۆستایانی كوردستان كۆبوونەوەیەكی فراوانی لەسەر رەوشی پەروەردەو خوێندن لەوڵاتانی عەرەبی و كوردستان ئەنجامدا، ئەم كۆبوونەوەیە بە ئامادەبوونی سەرۆك و جێگری یەكێتی مامۆستایانی كوردستان و ژمارەیەك لەئەندامانی مەكتەبی سكرتاریەت لەگەڵ شاندی رێكخراوی عەرەبی بۆ پەروەردە بەرێوەچوو.

رێكخراوی عەرەبی بۆ پەروەردە هەفتەمین كۆبوونەوەی ئاسایی خۆی لە هۆلی كۆبوونەوەی (ی.م.ك) لەهەولێر ئەنجامدا و تیایدا چەند تەوەرێكی گرنگی پەروەردەیی خرایەروو. لەمیانەی ئەم كۆبوونەوەدا، كە بەرێز (جەمال ئەدیب ئەلحسامی) سەرۆکی ڕێکخراوی عەرەبی بۆ پەروەردە و ئەندامانی دەستەی کارگێڕی لە وڵاتانی تونس، لوبنان، بەحرەین، فەلەستین و جەزائیر ئامادەبوون، باس لەرەوشی خوێندن و پەروەردە لەوڵاتی فەلەستین كرا، هەروەها باس لەدواكەوتنی مووچەی مامۆستایان و فەرمانبەرانی هەرێمی كوردستان كراو بڕیاردرا یاداشتێكی فەرمی بەرز بكرێتەوە بۆ حكومەتی عێراقی كە داوا دەكرێت مووچەی مامۆستایان تێكەڵ بە سیاسەت نەكرێت و بەزووترین كات دابەش بكرێت.

هەر لەم كۆبوونەوەدا كۆمەڵێ خاڵ و تەوەری دیكە خرایەبەرباس بەتایبەت رەوشی پەروەردە و خوێندن لەوڵاتانی نیشتمانی عەرەبی بەتایبەت ئەو وڵاتانەی كە قەیرانیان تێدایە وەكو (سوریا و یەمەن و سودان و تونس و لوبنان...) جگە لەمەش رێكخراوی عەرەبی بۆ پەروەردە لەم كۆبوونەوە راپۆرتی ساڵانەی خۆی لەماوەی رابردوو خستەڕوو هەروەها كۆمەڵی بابەتی كارگێری و دارایی رێكخراوەكە خرایەڕوو.

لەكۆتاییدا لەسەر داواكاری یەكێتی مامۆستایانی وڵاتی میسر بڕیاردرا دوای چوار مانگی تر كۆبوونەوەی رێكخراوی عەرەبی بۆ پەروەردە لە شاری قاهیرە لەوڵاتی میسر بەرێوەبچێت.